Sindicato Nacional de CCOO de Galicia

Sindicato Nacional de CCOO de Galicia
Afíliate a Comisións Obreiras

xoves 7 de febreiro de 2019

O Supremo dálle a razón a CCOO e obriga a contratos mínimos de 25 horas e a actualizar salarios segundo o IPC na axuda a domicilio

  • O Alto Tribunal rexeita os recursos das empresas Clece e Eulen e ratifica as sentenzas previas do Tribunal Superior de Xustiza de Galicia, que xa son firmes

O Tribunal Supremo (TS) dálle a razón a Comisións Obreiras (CCOO) no seu litixio contra dúas das principais empresas do sector de axuda a domicilio en Galicia, «e tamén das máis incumpridoras en materia social», destaca o sindicato. O Alto Tribunal rexeita os recursos das demandadas e ratifica as sentenzas previas do Tribunal Superior de Xustiza de Galicia, que agora xa son firmes. Por esta razón, Eulen e Clece deberán actualizar os salarios consonte o IPC real e non poderán formalizar contratos inferiores ás 25 horas semanais.

CCOO levou a cabo unha intensa campaña de denuncias contra os abusos laborais no sector

CCOO levou a cabo unha intensa campaña de denuncias contra os abusos laborais no sector

Na sentenza de unificación de doutrina 1362/2018, o TS obriga a Clece —«e o resto do sector de axuda a domicilio», aclara o sindicato— a establecer por contrato unha xornada mínima de 25 horas semanais. Con esta sentenza na man, «xa non existe dúbida ningunha: os contratos cunha duración inferior son ilegais», apunta Sergio López, secretario xeral da Federación de Construción e Servizos de CCOO de Galicia. Polo tanto, estes contratos «deberán aumentar o número de horas e tamén o salario na parte proporcional», sinala o sindicalista.

A outra sentenza de unificación de doutrina, número 1851/2018, obriga a Eulen a actualizar os salarios conforme o IPC real do ano anterior. Deste xeito, o salario base sitúase en 1034,37 euros para unha traballadora a tempo completo.

Sergio López sinala que CCOO, sindicato maioritario no sector, foi «a única organización que se atreveu» a denunciar as grandes entidades do sector en Galicia. «As empresas xa están temendo que as sentenzas aínda pendentes, sobre asuntos como calendario laboral, bolsas de horas, xornadas e excesos, acaben cos abusos que se están producindo neste sector», salienta o dirixente sindical.

Desde CCOO lembran que todo o persoal do sector de axuda a domicilio pode acudir aos servizos xurídicos do sindicato para formalizar as súas reclamacións individuais —con carácter retroactivo—, tanto en materia de contratación como de salarios.

O Supremo dálle a razón a CCOO e obriga a contratos mínimos de 25 horas e a actualizar salarios segundo o IPC na axuda a domicilio

xoves 7 de febreiro de 2019

Áreas temáticas relacionadas

Información - Novas