Sindicato Nacional de CCOO de Galicia

Sindicato Nacional de CCOO de Galicia
#QueNonChaXoguen co salario mínimo

xoves 31 de xaneiro de 2019

CCOO inicia unha campaña para informar dos seus dereitos a mocidade que está a ser «explotada» nas prácticas en empresas

  • O sindicato calcula que en Galicia hai ao redor de 34.000 mozas e mozos facendo algún tipo de prácticas, e 20.000 deles realizan prácticas non laborais sen remuneración

O Sindicato Nacional de Comisións Obreiras de Galicia (CCOO) presentou hoxe unha campaña para informar os bolseiros e bolseiras dos seus dereitos e frear situacións abusivas. «Tes bolsa ou tes traballo?» é o lema da iniciativa, dirixida aos preto de 34.000 mozos e mozas que actualmente fan algún tipo de prácticas na comunidade autónoma, con especial atención aos case 20.000 que realizan prácticas non laborais sen remuneración.

Maica Bouza, secretaria de Emprego, e Omar Ceveira, secretario de Xuventude

Maica Bouza, secretaria de Emprego, e Omar Ceveira, secretario de Xuventude

O secretario de Xuventude de CCOO, Omar Ceveira, sinalou que achegar o sindicato á mocidade é unha tarefa «estratéxica» da organización, enfocada sobre todo á loita contra a precariedade. Esta precariedade ten «dúas vertentes moi marcadas».

Unha dáse no ámbito estritamente laboral —rotación, baixos salarios e contratos temporais ou a tempo parcial—. A outra abrangue todo o camiño que un mozo ou moza percorre desde que remata os estudos ata que asina o primeiro contrato. Este tránsito faise, na meirande parte, mediante prácticas non laborais. «Que non teñan unha relación laboral, non significa que non haxa unha normativa que cumprir», apuntou Ceveira.

Desde hai máis dun ano, Comisións traballa coa Guía de bolseiros e aprendices nas universidades e centros de FP, para informar dos seus dereitos as persoas que acceden ás prácticas após remataren os estudos. A raíz diso «constatamos moitos casos de persoas cuxas condicións non eran respectadas», sinalou Ceveira. Por iso nace esta nova campaña, para chegar «á mocidade que está sendo explotada, facendo o traballo dunha persoa asalariada, sen titor ou un cometido non relacionado cos estudos que cursou», salientou o sindicalista.

A falta de estatísticas dificulta actuar

Pola súa parte, a secretaria de Emprego, Maica Bouza, lembrou que estas situacións, que «son ou poden ser irregulares», non aparecen nas estatísticas. Esta é unha das principais dificultades con que se atopa o sindicato, por iso, unha das reivindicacións de CCOO é a creación dun censo que recolla todas as mozas e mozos que fan prácticas —especialmente no caso das non laborais—, porque «é a maneira de poder actuar de xeito eficaz e visibilizar o colectivo».

No eido confederal, CCOO propúxolle ao Goberno a creación dun estatuto do bolseiro. O Executivo presentou unha proposta «que non é máis ca unha primeira análise da situación», aclarou Bouza. Segundo os seus cálculos, en Galicia hai ao redor de 34.000 mozas e mozos facendo algún tipo de prácticas. O groso desta cifra, ao redor de 20.000 persoas, realizan prácticas non laborais sen remuneración. O resto serían ao pé de 4000 que fan prácticas remuneradas e 9800 mozas e mozos que no último ano fixeron prácticas con contrato de formación e aprendizaxe —este último dato si está plenamente contrastado.

Fraude nas prácticas

Segundo Bouza, a principal fraude que se comete coas prácticas é que se afastan da finalidade para a que foron concibidas: acompasar a formación teórica dunha formación práctica cun itinerario formativo. «Moitas veces o que acontece é que as persoas en prácticas fan traballos non relacionados coa súa formación, carecen de titor ou titora, non obteñen ao final un certificado que detalle as funcións desempeñadas ou, directamente, están cubrindo persoal que deixou unha vacante», censura a sindicalista.

Por esta razón, no marco da campaña «Tes bolsa ou tes traballo?», CCOO organizará actuacións concretas en centros de FP, en universidades e entidades coas que asinan convenios, pero tamén en grandes concellos, mancomunidades ou consorcios.

CCOO inicia unha campaña para informar dos seus dereitos a mocidade que está a ser «explotada» nas prácticas en empresas

xoves 31 de xaneiro de 2019

Documentos relacionados

Cartel da campaña [PDF]
Folla informativa [PDF]

Áreas temáticas relacionadas

Áreas - Acción sindical - Actualidade
Áreas - Emprego e Formación - Actualidade
Información - Novas

  • Zona de afiliados
  • Afiliate a CCOO
  • Lista de locais do SN de CCOO
  • Gabinete de Saúde Laboral (2019)
  • Gabinetes de saúde laboral
  • Fixemos, facemos, faremos historia
  • Galicia Sindical n.º 39 - 1.ª quincena de abril de 2013
  • Autoemprego
  • Queres ser delegado?
  • Fundación 10 de Marzo
  • Portal de transparencia
  • Atlantis Seguros
  • Atlantis Seguros