Sindicato Nacional de CCOO de Galicia. Continúan as actividades para procurar unha saída laboral ás beneficiarias do proxecto Galitex

mércores 18 de setembro de 2019

Continúan as actividades para procurar unha saída laboral ás beneficiarias do proxecto Galitex

Cara á finalización do proxecto, intensifícanse as actuacións para mellorar a empregabilidade das beneficiarias de Galitex, proxecto para a reinserción laboral de persoas en situación de desemprego no sector da confección de prendas de vestir.

Xornada do pasado venres en Ordes

O pasado venres, día 13, tivo lugar un encontro na praza de abastos do Concello de Ordes, no que se puido coñecer de primeira man a experiencia persoal e profesional de dúas cociñeiras de recoñecido prestixio, Lucía Freiras (A Tafona) e Megu Ramil (A Casa dos Xacobes).

No mesmo lugar, os días 19 e 20 de setembro desenvolveranse dúas xornadas de fomento do emprendemento. Comezarán cunha charla de Ángela Valdenebro, cofundadora de Thunders Love, unha empresa de deseño e comercialización de calcetíns. Tamén haberá un obradoiro para a identificación de ideas con potencial de emprendemento, outros para a maduración das ideas identificadas previamente, a presentación do mapa de posibles axudas ao emprendemento e diversas sesións individuais de titorización.