Sindicato Nacional de CCOO de Galicia

Sindicato Nacional de CCOO de Galicia
Afíliate a CCOO

luns 2 de outubro de 2017

Galicia ponse en marcha por pensións dignas

  • O noso país súmase desde hoxe á mobilización estatal en defensa do sistema público de pensións, que culminará o vindeiro día 9 cunha manifestación en Madrid

Galicia xa se puxo en marcha en defensa dunhas pensións dignas. Desde hoxe, pensionistas de todo o país mobilízanse con CCOO e UGT en defensa do sistema público de pensións cunha marcha a pé que os levará ata Madrid, onde se manifestarán o vindeiro día 9 xunta compañeiras e compañeiros de todo o Estado. O inicio simbólico desta adhesión tivo lugar ás 11 horas, cunha multitudinaria asemblea fronte á sede central da Xunta, no complexo administrativo de San Caetano.

Galicia ponse en marcha por pensións dignas

Galicia ponse en marcha por pensións dignas

Na súa intervención, o secretario xeral do Sindicato Nacional de CCOO de Galicia, Ramón Sarmiento, salientou o compromiso do colectivo de pensionistas e mais a súa solidariedade: «A vosa militancia non está só co índice de revalorización das pensións», apuntou, tamén está «cos douscentos mil parados galegos, cos cen mil que non teñen ningunha prestación, está con todas as traballadoras e traballadores precarios, que son os vosos fillos ou netos».

Sarmiento asegurou que o «outono quente» de mobilizacións anunciado polo sindicato «comeza polas pensións, pero ten que rematar cunha gran mobilización social que teña en conta os dereitos dos cidadáns e das cidadás». Ao seu ver, as pensións, o emprego, os dereitos sociais e os servizos públicos «deberían ser as prioridades do debate social neste país», porque isto é «o que realmente lle importa á clase traballadora».

Finalmente, o secretario xeral de CCOO instou as forzas de esquerda, as organizacións «chamadas a ser unha alternativa», a se poren de acordo para desaloxar o PP do Goberno tanto en Galicia como no Estado. «Están tardando», aseverou.

Manifestación

Após a concorrida asemblea, centos de persoas manifestáronse ata o barrio de San Lázaro, percorrendo en sentido inverso un treito do Camiño de Santiago. Nese punto, catorce compañeiras e compañeiros de CCOO e de UGT fixeron dez quilómetros máis a pé.

Mañá martes, día 3, repetirase o mesmo esquema en Lugo, onde a delegación galega de xubilados e pensionistas, acompañada de compañeiros de UGT e CCOO, participarán nunha asemblea ás 11 da mañá na praza Maior. Despois manifestaranse por varias rúas da cidade ata a confluencia da avenida de Madrid coas rúas Pardo Ouro e Das Artes, onde a delegación galega marchará a pé en dirección a Ponferrada.

O mércores, día 4, a delegación galega estará xa na localidade castelán-leonesa de Benavente, onde confluirá coas marchas procedentes de Asturias e Castela e León, ata chegaren o día 9 a Madrid para participar na gran manifestación convocada na Porta do Sol.

Pensións dignas

Con esta acción, os sindicatos tratan de xerar debate social sobre a problemática do presente e o futuro das pensións, a rede máis potente de protección social e que dá cobertura non só aos nove millóns de persoas que perciben unha pensión, senón a moitas familias que a día de hoxe dependen delas. De feito, o corenta por cento das pensións cobren por completo as súas respectivas unidades familiares.

No punto en que se está actualmente, urxe unha volta á concertación sobre o modelo de pensións que rompeu coa reforma imposta polo PP no ano 2013, co fin de recuperar o futuro dunhas pensións dignas e terminar co empobrecemento dos pensionistas. Só un dato: hoxe, o corenta por cento das pensións que se cobran en Galicia andan polos 600 euros, xusto no limiar da exclusión social e da pobreza.

CCOO e UGT demandan que se asegure o poder adquisitivo das pensións, erradicar o déficit da Seguridade Social, garantir o presente e futuro das pensións e que o Goberno atenda as iniciativas aprobadas no Parlamento para garantir o poder de compra das pensións.

Galicia ponse en marcha por pensións dignas

luns 2 de outubro de 2017

Ligazóns de interese relacionadas

Galería de imaxes
Campaña informativa na nosa páxina web

Áreas temáticas relacionadas

Áreas - Sociopolítica - Política social - Actualidade
Información - Novas
O teu sindicato - Unións Territoriais - Santiago Barbanza - Actualidade
O teu sindicato - Federacións Nacionais - Pensionistas e Xubilados - Actualidade