Ricardo Santos, de CCOO do Hábitat (der.), intervén na conferencia de prensa en defensa da planta de Lousame
A Mancomunidade está integrada polos concellos de Lousame, Muros, Porto do Son, Noia, Brión e Carnota. A planta de reciclaxe presta servizo aos seis, así como a outros tres que están adheridos: Pontecesures, Rois e Ames. En total, unha área con máis de 86.000 habitantes.
Os sindicatos reprochan que os concellos que conforman a Mancomunidade non crearon unha estrutura, en particular a figura da xerencia, limitándose a unha presidencia rotatoria dun ano; do labor diario de xestión —facturas, investimentos ou seguimento do contrato— encárganse os secretarios ou secretarias municipais. «O traballo dunha planta destas dimensións fai preciso que estea á fronte unha persoa con dedicación total e perdurable no tempo», apuntou Ricardo Santos, responsable comarcal de CCOO do Hábitat.
Desleixo na xestión
Alén da falta de xestión, outro problema é a falta de investimentos, tanto nas instalacións coma noutros equipamentos, así como a «xudicialización de toda a relación coa empresa», que levou a unha acumulación de xuízos perdidos pola Mancomunidade nos últimos anos.
Como exemplo do desleixo na xestión, os traballadores e traballadoras refiren o estado dos camións. Segundo o contrato asinado con FCC, tiñan unha duración prevista de dez anos e a Mancomunidade debía asumir a renovación. «Pasados dez anos decatáronse de que non fixeran a previsión de fondos para os camións». En consecuencia, estanse empregando vehículos máis vellos do previsto, que acumulan desgaste e avarías.
As instalacións, que teñen xa vinte anos, precisan unha actualización. Por exemplo, o vertedoiro está sobrepasado, con 25.000 toneladas máis das que estaban previstas cando foi deseñado. Está pendente o seu selado e a apertura da última cela, «o que lle daría para dous anos máis, sen que polo momento haxa autorización para facer un novo», explican os traballadores.
A ameaza de Sogama
O novo concurso para a xestión da planta está previsto para o 2023. O temor do persoal é que as instalacións se convertan nunha simple planta de transferencia para Sogama. En Lousame só se faría unha selección básica, levando o resto dos residuos a Cerceda para a súa incineración.
Ante isto, Ricardo Santos lembra que a planta de Lousame conta cunha separación de residuos cinco punto superior á media e que o seu modelo está avalado pola Unión Europea, non así o de Sogama. «Cambiando o modelo de Lousame estariamos cada vez máis lonxe de cumprir cos obxectivos que fixa Europa, amais de destruír emprego».
Manifestación
A xornada de mobilización do domingo comezará cunha caravana de coches ás 11:00 que partirá do porto deportivo de Portosín e rematará en Porto do Son. A seguir, ás 12:00, unha manifestación partirá da igrexa de Noal e rematará diante da casa consistorial sonense.