Sindicato Nacional de Comisións Obreiras de Galicia

Sindicato Nacional de Comisións Obreiras de Galicia | 25 Abril 2024.

Sácalle partido á túa cota de afiliación

Sindicato Nacional de Comisións Obreiras de Galicia

CCOO lamenta que o BNG continúe rompendo os consensos parlamentarios para a conmemoración institucional do 10 de Marzo

Sindicato Nacional de Comisións Obreiras denuncia que os «intereses partidistas» e a «pretensión de dominio que o BNG quere exercer sobre a historia obreira de Galicia» impidan lograr un consenso no Parlamento galego e reeditar o apoio unánime ao 50.º aniversario do 10 de Marzo, Día da Clase Obreira Galega, e das loitas obreiras en xeral de 1972.

09/03/2022.

Temas

50 anos na historia

50 anos na historia

O martes debateuse —e hoxe votouse— na Cámara autonómica unha proposición non de lei do grupo parlamentario do BNG, cuxo contido, no fondo, é o mesmo que previamente CCOO sometera á consideración dos tres grupos parlamentarios, logrando o aval do PSdeG e o PPdeG. O BNG nin sequera respondeu.

CCOO explica que traballou «con discreción» durante semanas nunha declaración institucional para reeditar os «históricos» consensos de 1997 e 2006 —sendo presidentes Manuel Fraga e Emilio Pérez Touriño, respectivamente—, cando todos os grupos parlamentarios apoiaron o recoñecemento do 10 de Marzo como data de especial significado. No último caso, ademais, instábase a Xunta a se sumar ás celebracións do Día da Clase Obreira Galega.

A diferenza coas dúas ocasións anteriores é que a proposición non de lei (PNL) que os nacionalistas levaron hoxe ao Parlamento non conta co apoio do resto dos grupos, o que impide calquera posibilidade de acordo. Por outra parte, CCOO reprocha a «deslealdade institucional» do BNG, a quen se lle remitiu o 7 de febreiro un escrito solicitando unha reunión. Os nacionalistas non responderon, pero só tres días despois rexistraron no Parlamento a súa propia PNL.

Para Comisións Obreiras, o BNG «equivócase» ao utilizar con «finalidades partidistas» unha materia que, «pola súa transcendencia histórica, debería suscitar o máximo consenso». Un xesto «aínda menos entendible» cando este ano se cumpre o 50.º aniversario dos feitos polos que o 10 de Marzo é conmemorado como Día da Clase Obreira Galega.

CCOO lamenta que o BNG quixera «forzar unha situación indesexable» como é levar ao Parlamento unha PNL sabendo de antemán que sería rexeitada porque non tivo interese en buscar o necesario consenso. «A única interpretación que atopamos é que procuran un protagonismo que non lles corresponde, apropiándose duns feitos históricos nos que nós estabamos presentes e eles non».

Neste sentido, CCOO lembra que conmemora os feitos do 10 de Marzo e en xeral as loitas obreiras daquel ano 1972 «xa desde a clandestinidade», realizando grandes esforzos para pór en valor esta memoria obreira unha vez legalizado o sindicato, celebrando anualmente esa data como Día da Clase Obreira Galega ou constituíndo a Fundación 10 de Marzo (1991), «depositaria do maior arquivo sindical galego e do asociacionismo obreiro». Esta Fundación, ademais, concede cada ano desde 1992 os Premios 10 de Marzo, dos que a pasada semana celebramos a 30.ª edición.

Para CCOO, este xeito de actuar é «unha burla a Comisións Obreiras, ao Parlamento de Galicia, á clase obreira e ao pobo galego en xeral». Non obstante, desde o sindicato apuntan que aínda se está a tempo de chegar a unha proposta de consenso, «na que traballariamos encantados», sempre que o BNG «levante o veto» á declaración institucional que xa tiña a vontade de acordo dos grupos Popular e Socialista.

Novas relacionadas

10 DE MARZO 1972-2022: 50 anos de loita obreira na cidade rebelde

CCOO celebra en 2022 «50 anos na historia» e lembra que os dereitos hai que loitalos cada día

Adianto do programa de actos para conmemorar o Día da Clase Obreira Galega

Entrega dos Premios 10 de Marzo 2022

Presentación do tráiler do documental '10 de Marzo', patrocinado por CCOO

PREMIO 10 DE MARZO 2022, Jaime Pereira Silva

PREMIO 10 DE MARZO 2022, Josefa Piñón Seoane

PREMIO 10 DE MARZO 2022, Almudena Grandes Hernández

10 DE MARZO DE 2022: DÍA DA CLASE OBREIRA GALEGA

10M - CCOO celebra o Día da Clase Obreira Galega cunha multitudinaria manifestación en Ferrol

A dirección de CCOO visita o Concello de Ferrol como parte dos actos de celebración do 10 de marzo