Sindicato Nacional de Comisións Obreiras de Galicia | 19 Abril 2024.

A Xustiza condena a CSIF por vulnerar o dereito ao honor de CCOO e UGT

    O Xulgado de Primeira Instancia número 2 de Santiago condena o sindicato CSIF por vulnerar nunha publicación dixital o dereito ao honor de CCOO e UGT. O texto obxecto da demanda publicouse no boletín web ‘Herald Toupeiras’, editado polo sindicato corporativo, e acusaba os denunciantes de conivencia coa Xunta de Galicia para impoñer a mobilidade forzosa dos funcionarios.

    31/05/2022.
    Extracto da sentenza que condena a CSIF por vulnerar o dereito ao honor de CCOO e UGT

    Extracto da sentenza que condena a CSIF por vulnerar o dereito ao honor de CCOO e UGT

    Na publicación, a CSIF aludía a unha reunión —no contexto do diálogo social— onde supostamente ambos os sindicatos tiveran coñecemento desta decisión e actuaban en conivencia co PP para impoñer a mobilidade forzosa ao persoal funcionario. Pártese dun feito non veraz e non contrastado para realizar unhas afirmacións «claramente difamatorias e atentatorias contra o honor dos demandantes nun tema intrinsecamente ligado á súa actividade e fin legal constitucional, a defensa dos dereitos dos traballadores», precisa a sentenza.

    A sentenza deixa claro que CSIF non transmite de xeito «recto e veraz a información que pretende comunicar, baséase en simples conxecturas ou rumores non confirmados». A resolución xudicial tamén afirma que queda probado que as conclusións que expón a CSIF no seu artigo teñen como único fundamento a simple participación de UGT e CCOO na devandita mesa de diálogo social, «sen ter coñecemento concreto do tratado nela ou se efectivamente se abordou o tema da mobilidade forzosa». Por tal motivo, a sentenza afirma que a publicación está dirixida «claramente a difamar» a actuación dos demandantes CCOO e UGT.

    Na súa defensa, a CSIF pretendeu ampararse na liberdade de información, malia que a xurisprudencia é clara: só pode prevalecer sobre o dereito ao honor se a información cumpre co requisito da veracidade, «e por veracidade ha entenderse o resultado dunha razoable dilixencia por parte do informador para contrastar a información», recolle a sentenza. Dilixencia que, como aclara a propia sentenza, neste caso non consta nin se acredita. 

    Antes de chegar á vía xudicial, CCOO e UGT esixíranlle á CSIF unha rectificación pública que nunca se produciu. A sentenza estima integramente a demanda e condena o sindicato corporativo a eliminar a información obxecto da demanda e a publicar ao completo a sentenza nos mesmos medios utilizados para a súa difusión e durante o mesmo tempo. Así mesmo, deberá aboar a cantidade simbólica dun euro a cada un dos sindicatos denunciantes así como as custas xudiciais.

    «Non todo vale»

    Tanto UGT-Galicia como o Sindicato Nacional de CCOO de Galicia coidan satisfactoria esta sentenza, que deixa «moi claro que non todo vale na loita sindical». Ambas as organizacións insisten en que «as mentiras e as calumnias non teñen cabida para desacreditar o gran traballo que os sindicatos de clase facemos en defensa dos traballadores e das traballadoras».

      •