Concentracións o 30 de novembro en defensa da sanidade pública
Desde a plataforma denuncian os problemas con que se atopa a poboación para ser atendida nos centros de saúde, PAC e servizos de pediatría e atención primaria, as listaxes de espera de días e as consultas masificadas ou a precariedade laboral e falta de recursos que padece o persoal, entre outras eivas.
SOS Sanidade denuncia a falta de vontade da Xunta de Galicia para corrixir a situación. De feito, o orzamento sanitario para o 2023 case non aumenta respecto do ano pasado. No caso da atención primaria, porta de entrada ao sistema, o investimento só sobe do 13,4 ao 13,7 % do gasto sanitario total.
Con este investimento é imposible recuperar a normalidade nas consultas de medicina familiar, así como os servizos de pediatría e os PAC que pecharon por falta de persoal médico, denuncia a plataforma, que convoca para mañá concentracións en todas as cidades e en numerosas vilas de Galicia.
Antes de cada concentración está previsto recoller sinaturas para apoiar a iniciativa lexislativa popular (ILP) en defensa da atención primaria. Ata o momento xa se recolleron máis de 17.000 —o mínimo legal son 10.000— e SOS Sanidade aspira a reunir aínda máis apoios antes de que a iniciativa se tramite no Parlamento de Galicia.
Concentracións
— A Coruña. Ás 20 horas, no Obelisco
— Ferrol. Ás 19 horas, dianto do ambulatorio Fontenla Maristany
— Burela. Ás 12 horas, diante do centro de saúde
— Santiago de Compostela. Ás 20 horas na praza Roxa
— Vigo. Ás 19 horas, diante do museo MARCO
— Pontevedra. Ás 19 horas, no cruzamento de Benito Corbal con Sagasta
— O Grove. De 8 a 10 horas diante do centro de saúde e de 10:30 a 12:30 na rúa Castelao, diante da antiga Abanca
— Sanxenxo. De 8:30 a 11 horas diante do centro de saúde de Baltar e de 12:30 a 14 horas diante do centro de saúde de Vilalonga
— Moaña. Ás 12 horas diante do centro de saúde
— Ponteareas. Ás 19 horas na praza Bugallal
— A Guarda. Ás 20 horas na praza Avelino Vicente
— Nigrán. As 19 horas na alameda da Ramallosa
— Cambados. Ás 11:30 horas diante do centro de saúde
— Cerdedo-Cotobade. Ás 11:30 horas diante do centro de saúde
— Arbo. Ás 19:30 na praza do Concello
— Vilagarcía de Arousa. Ás 19 horas diante do centro de saúde de San Roque