No último ano, o desemprego diminuíu en Galicia en 10 362 persoas, ou sexa, unha redución do 6,79 %. Con todo, este descenso é inferior ao do Estado, onde a caída é do 8,64 %. Por outra banda, a afiliación á Seguridade Social no último día de decembro increméntase en 10 717 persoas (1 %) respecto ao mesmo período do ano anterior (2,3 % en España); pero atendendo á variación da media mensual, o aumento sería de 9479 persoas en Galicia, un 0,92 % fronte ao 2,38 % estatal.
Impacto positivo da reforma laboral
Outro dato positivo é que, «grazas á reforma laboral» —puntualiza Bouza—, os contratos indefinidos triplicáronse, ao tempo que a precariedade se reduciu «de maneira notable». «Isto ten como consecuencia a mellora das condicións de vida da cidadanía galega», destaca a secretaria de Emprego de CCOO.
No lado contrario, a sindicalista denuncia a fenda de xénero que sofren as traballadoras galegas. «Está moi relacionada coas actividades e condicións en que desenvolven maioritariamente o seu traballo», apunta Bouza. Por esta razón, CCOO esixe un «maior compromiso tanto das empresas como da Administración autonómica» para mudar neste novo ano a situación laboral das mulleres galegas.
As mulleres concentran o groso do desemprego
En Galicia hai 59 848 homes e 82 374 mulleres en desemprego ao remate do mes de decembro de 2022. No último ano, o paro diminuíu tanto entre os homes (4895 desempregados menos) como entre as mulleres (5467 menos). A maior redución do desemprego feminino non impide, con todo, que as mulleres teñan un peso cada vez maior no paro: 52 % en 2021 por 58 % en 2022.
Por idades, o desemprego baixa entre a xente máis nova en 743 persoas; entre as de máis idade, en 11 826. Por sectores, redúcese en todos, pero especialmente nos servizos, con 6208 persoas desempregadas menos. A continuación están a industria (1967 menos), a construción (1133), o primario (917) e o colectivo sen emprego anterior (136).
Análise da contratación
En 2022 rexistráronse en Galicia 845 243 contratos, dos cales 574 723 foron temporais e 270 520 indefinidos. Os contratos indefinidos, que en 2021 representaban o 10 % do total da contratación, en 2022 son xa o triplo, o 32 %. Pola contra, os contratos temporais pasaron de supoñer o 90 % ao 68 % no último ano. É dicir, o «impacto positivo da reforma laboral triplicou o número de contratos indefinidos e reduciu nun terzo os temporais», salienta Maica Bouza.
Afiliación á Seguridade Social
Canto á Seguridade Social, a afiliación media mensual medra en 9479 persoas en 2022, situando o número de persoas traballadoras afiliadas por riba do millón (1 042 263). Deste total, 811 611 corresponden ao réxime xeral, 206 225 ao de autónomos e 19 925 ao réxime especial do mar. Como xa se indicou, a afiliación media en Galicia medra un 0,92 % mentres que en España medra un 2,38 %. Se facemos a comparativa cos datos do último día de mes, a afiliación increméntase en 10 717 persoas en 2022, ata situarse en 1 032 624 afiliados e afiliadas, rexistrando un incremento anual do 1 % cando no Estado é do 2,3 %.