Sindicato Nacional de Comisións Obreiras de Galicia | 20 Abril 2024.

As mulleres, principais prexudicadas pola negativa evolución do mercado laboral en xaneiro

    A contratación indefinida segue aumentando en Galicia grazas ao acordo de reforma laboral asinado por CCOO.

    02/02/2023.
    datos paro xaneiro 2023

    datos paro xaneiro 2023

    Os datos coñecidos hoxe indican que, en xaneiro, o paro rexistrado medrou en Galicia en 2826 persoas, un 1,98 %, e a afiliación á Seguridade Social, tomando o dato do último día do mes, rexistra unha baixada de 3991 afiliados e afiliadas. Se consideramos os datos da afiliación media mensual, esta redúcese en 11 525 persoas (-1,06 %) respecto ao mesmo período do mes anterior.

    Os datos reflicten un dos menores incrementos do desemprego no mes de xaneiro da serie histórica. O desemprego medra tanto nos homes (626 desempregados máis) coma nas mulleres (2200 desempregadas máis), pero o maior aumento do desemprego feminino tradúcese en que seis de cada dez persoas paradas sexan mulleres. O desemprego medra en 140 mozos e mozas menores de 25 anos e tamén entre as persoas maiores desa idade, con 2686 desempregadas máis.

    No mes de xaneiro asináronse 50 956 contratos en Galicia (un 2,1 % menos ca en decembro) e, aínda que o groso deles son temporais (32 970 temporais por 17 986 indefinidos), cómpre subliñar o crecemento da contratación indefinida dun 17,9 % fronte á caída da temporal nun 10,4 %, como resultado do impacto da reforma do mercado de traballo acordada entre as organizacións sindicais, patronais e o Goberno.

    Análise por sexos e sectores

    En Galicia están no desemprego 60 474 homes (626 máis ca en decembro) e 84 574 mulleres (2200 máis que no mes anterior). Seis de cada dez persoas paradas son mulleres. Atendendo ás idades, hai 5671 persoas menores de 25 anos inscritas no Servizo Público de Emprego (140 máis ca en decembro) e 139 377maiores desa idade (2686 máis).

    O paro diminúe en todos os sectores de actividade agás nos servizos, onde medra en 3100 persoas: no primario hai 9 persoas desempregadas menos, na industria 56 e 119 na construción. No colectivo sen emprego anterior, o desemprego redúcese en 90 persoas. O evolución do emprego por sectores responde ao patrón dos meses de xaneiro, cando se perde boa parte do emprego creado na campaña de Nadal e de rebaixas do sector dos servizos.

    Análise da contratación

    En xaneiro rexistráronse en Galicia 50 956 contratos; deles, 32 970 foron temporais e 17 986, indefinidos. Os contratos temporais supoñen o 35,3 % do total de contratos rexistrados, resultado do incremento da contratación indefinida dun 17,9 %, cando a temporal cae un 10,4 %. O volume de contratos rexistrados en xaneiro é un 2,1 % inferior aos formalizados no mes de decembro.

    Afiliación á Seguridade Social

    Canto á Seguridade Social, cos datos do último día de mes, a afiliación cae en 3991 persoas, ata se situar en 1 028 633 afiliados e afiliadas; rexístrase unha caída do 0,36 % con respecto ao mes anterior.

    A afiliación media mensual cae en 11 525 persoas, polo que o número de persoas traballadoras afiliadas se sitúa en 1 030 738. Deste total, 806 574 corresponden ao réxime xeral, 204 964 ao de autónomos e 19 200 ao réxime especial do mar. A afiliación media en Galicia cae un 1,06 %.

    Prestacións por desemprego

    En decembro cobraron algún tipo de prestación por desemprego 88 742 persoas: 42 693 prestacións contributivas e 46 049 subsidios.

    En relación aos ERTE do mes de xaneiro, hai que sinalar que este mecanismo daba cobertura a 984 persoas ao final do mes, das cales 920 estaban en ERTE ETOP, 60 en ERTE FORZA MAIOR e 4 no MECANISMO REDE SECTORIAL AXENCIAS DE VIAXE. Do total de persoas afectadas, 673 son homes e 311 mulleres.

      •