Sindicato Nacional de Comisións Obreiras de Galicia | 14 Xuño 2025.

O paro baixa en Galicia por riba da media estatal, pero a creación de emprego segue por detrás

    CCOO valora positivamente os datos do paro rexistrado do mes de maio, coñecidos hoxe, que reflicten unha baixada do desemprego e un incremento da afiliación. Con todo, hai aspectos por mellorar: mentres que o paro descende por riba da media estatal, a creación de emprego segue por detrás. Ademais, o sindicato advirte da menor capacidade da economía galega para xerar postos de traballo, malia o marco normativo común, e da persistente desigualdade entre mulleres e homes no mercado laboral.

    03/06/2025.
    Tres de cada dez empregos creados no mes de maio corresponden á hostalaría

    Tres de cada dez empregos creados no mes de maio corresponden á hostalaría

    En maio, o paro rexistrado reduciuse en 3904 persoas en Galicia (-3,4 %) e a afiliación á Seguridade Social, tomando o dato do último día do mes, rexistra unha suba de 11.396 afiliados e afiliadas (+1,1 %). Considerando os datos da afiliación media mensual, sobe en 7372 persoas (+0,7 %).

    No tocante á evolución tanto por sexos como por sectores, a secretaria de Políticas Públicas de CCOO, Maica Bouza, explica que «responde á contratación estival, como adoita suceder cada ano por estas datas». Neste sentido, tomando como referencia a afiliación ao réxime xeral e ao de autónomos, a sindicalista conclúe que tres de cada dez empregos creados no último mes corresponden á hostalaría.

    Os datos do mes de maio tamén evidencian unha «menor capacidade da economía galega para xerar postos de traballo, malia o marco normativo común», advirte Maica Bouza. Por este motivo, pídelle á Xunta de Galicia que «tome nota» destas dificultades e «tome en serio» a necesidade de promover políticas que favorezan a creación de emprego nas actividades ligadas ao cambio de modelo produtivo, que supoñan unha «aposta de país» por uns sectores de alto valor engadido e traballo de calidade.

    Análise por sexos e sectores

    En Galicia están no desemprego 46 099 homes (-2092) e 65 542 mulleres (-1812). Seis de cada dez persoas paradas seguen sendo mulleres, a pesar da boa evolución do mercado laboral nos últimos meses. Atendendo ás idades, hai 4368 persoas menores de 25 anos inscritas no Servizo Público de Emprego (-274) e 107 273 maiores desa idade (-3630).

    O paro diminúe en todos os sectores de actividade: no primario hai 139 persoas desempregadas menos, na industria 334, na construción 278 e 2824 nos servizos. En termos relativos, todos os sectores de actividade rexistran baixadas do paro no entorno do 3 %. Pola súa parte, o colectivo sen emprego anterior mingua en 329 persoas.

    Análise da contratación

    En maio rexistráronse en Galicia 62 121 contratos, dos cales 43 365 foron temporais e 18 756 indefinidos. O volume de contratos rexistrados foi superior nun 20,9 % aos formalizados no mes precedente: a contratación indefinida sobe nun 3,9 % mentres que a temporal o fai nun 30,1 %. Deste xeito, só tres de cada dez contratos son indefinidos, mentres que a proporción a nivel estatal é catro de cada dez.

    Afiliación á Seguridade Social

    Canto á Seguridade Social, cos datos do último día de mes, a afiliación sobe en 11 396 persoas, ata situarse en 1 096 790 afiliados e afiliadas (+1,1 %). A afiliación media mensual aumenta en 7372, situando o número de persoas traballadoras afiliadas en 1 094 806. Deste total, 872 189 corresponden ao réxime xeral, 204 677 ao de autónomos e 17 940 ao réxime especial do mar. A afiliación media en Galicia increméntase nun 0,7 %.

    Nos réximes xeral e agrario, a afiliación media sobe en 7482 afiliados e afiliadas máis no último mes. Como xa se indicou, tres de cada dez empregos corresponden á hostalaría (2231) e un de cada dez ás actividades administrativas (1001). En termos interanuais, os maiores incrementos porcentuais atópanse na educación (4,1 %), transporte e almacenamento (3,7 %), actividades profesionais (3,5 %) e administrativas (3,4 %) e sanidade (3,3 %).

    Prestacións por desemprego

    En abril cobraron algún tipo de prestación por desemprego 69 015 persoas: 37 203 prestacións contributivas e 31 812 subsidios. En relación cos ERTE do mes de maio, sinalar que este mecanismo daba cobertura a 482 persoas a final do mes, das cales 313 estaban en ERTE ETOP e 169 en ERTE de forza maior.

      •