Sindicato Nacional de Comisións Obreiras de Galicia | 16 Setembro 2026.

CCOO pide cautela ao Goberno central ante a reforma da lei de estranxeiría e reclama unha política migratoria integral

    Ante o anuncio dunha reforma do marco xurídico de estranxeiría e asilo en España, CCOO pídelle ao Goberno cautela e acometer unha modificación así con serenidade, diálogo e perspectiva integral, especialmente nun contexto marcado pola crise xeoestratéxica, humanitaria e migratoria en Ceuta que xera unha gran sensibilidade social.

    27/08/2026.
    Posición de CCOO ante a reforma da Lei de estranxeiría

    Posición de CCOO ante a reforma da Lei de estranxeiría

    O sindicato sinala a súa preocupación por que esta iniciativa partira do Ministerio do Interior, xa que un anteproxecto de lei non se pode improvisar nuns días, e retrotráenos a tempos en que a política migratoria se baseaba no control e o tratamento policial, fronte a un enfoque que integre tamén as dimensións sociolaboral e de inclusión das persoas migrantes.

    Por iso, CCOO lembra que leva anos reclamando unha reforma da lei de estranxeiría e propón unha tripla abordaxe. Por un lado, unha lei de estranxeiría que estableza o estatuto xurídico das persoas estranxeiras en España, os seus dereitos, liberdades e obrigas; por outro, unha lei de migración que regule a dimensión sociolaboral dos fluxos migratorios; e, finalmente, unha lei de asilo que ordene os procedementos derivados das obrigas internacionais en materia de protección internacional.

    Para o sindicato, a política migratoria debe ser unha política de Estado —especialmente polas sensibilidades que suscita e ante a utilización demagóxica da inmigración por parte da extrema dereita en España e na Unión Europea— e por iso reclama responsabilidade ao Goberno e ás forzas políticas da oposición para evitar discursos e actuacións que poidan deteriorar a convivencia nunha sociedade plural e diversa como a española.

    CCOO advirte, ademais, de que calquera mecanismo de xestión migratoria estará abocado ao fracaso se as Administracións competentes non contan cos recursos necesarios. Neste sentido, o sindicato volve defender a creación dunha Axencia Española para as Migracións que integre as competencias actualmente dispersas entre distintas Administracións e organismos, para poder mellorar a eficacia da xestión migratoria. Por iso CCOO solicita que se activen os mecanismos habituais de consulta e diálogo institucional, para construír un novo marco normativo que garanta unha xestión eficaz das migracións, baseada no respecto aos dereitos das persoas.

    Documentación asociada

    Análise do anteproxecto de reforma da LOEX [PDF]

    Documentación asociada

    Análise do anteproxecto de reforma da LOEX [PDF]