CCOO defende o dereito ao aborto legal e seguro
O movemento feminista, así como todas as organizacións sociais e políticas que apoiamos e defendemos a igualdade e a non discriminación, entendemos que tanto as mulleres coma os homes debemos ter o mesmo trato e os mesmos dereitos e liberdades.
Porén, as políticas baseadas no modelo de familia tradicional, heteronormativo e patriarcal levan implícita a crenza de que é lexítimo lexislar sobre os corpos das mulleres porque, realmente, as liberdades e os dereitos delas sitúanse por debaixo das dos homes. Esta premisa é a que defenden os partidos da dereita e a ultradereita, e a súa crecente participación nos gobernos dos países occidentais está a promover a eliminación de moitas políticas e regulacións normativas que xa aceptaran que o aborto debe ser un dereito das mulleres para decidir libre e informadamente sobre os seus propios corpos.
Os desafíos que afrontan os movementos por unha democracia real que non discrimine a metade da poboación semellan, hoxe en día, tan fortes como os que afrontaron nos países suramericanos e caribeños as feministas dos anos 90, que foron as promotoras deste día de loita pola igualdade real a través da defensa do dereito fundamental a decidir sobre o propio corpo.
Trinta anos despois, esa loita ten que facerse máis forte para combater as políticas retrógradas que están rexurdindo por todo o mundo occidental da man da ultradereita.
Ao longo dos anos, a prohibición e ilegalización do aborto amosouse ineficaz na redución do número de abortos, pero efectiva no aumento da mortaldade cando se realizan clandestinamente e baixo condicións pouco hixiénicas e inseguras. Pola contra, o número de abortos redúcese realmente naqueles países onde a educación sexual é de calidade e desde idades temperás.
Por iso, normas como a lei española de liberdade sexual son tan importantes no camiño cara a unha sociedade que despenalice o aborto por discriminatorio e controlador do corpo da metade da poboación, unha sociedade que comprenda que o aborto debe ser unha decisión persoal da nena ou muller que se atope nesa situación.
Seguiremos loitando por acadar unha sociedade na que esa decisión sexa unha realidade factible e non criminalizadora para todas as nenas e mulleres.
Hoxe, máis ca nunca, non podemos esquecer a perversión dunha regulación restritiva que o único que consegue é poñer en risco serio as vidas de tantas rapazas e mulleres todos os días.
Hoxe, máis ca nunca:
as CCOO reivindicamos o ABORTO LIBRE E SEGURO XA!