Acordo asinado pola UGT e CIG
O resultado da votación entre a afiliación a CCOO foi:
❌ NON => 59 %
✅ SI => 41 %
Para a maioría da afiliación, as melloras do Convenio Colectivo do Metal da Provincia de Pontevedra (2023-2025) non son suficientes para os intereses dos traballadores e traballadoras do sector.
Recolle incrementos que representan un total do 9 % (3 % cada un dos tres anos de vixencia), con ata un máximo de 2 % adicional anual se o IPC estiver por encima da suba acordada.
Os atrasos desde o 01/01/2023 poderanse pagar ata o 31 de outubro de 2023.
Xornada laboral anual: redución de 16 horas (8 en 2024 e outras 8 en 2025), cun día adicional de vacacións (sumando un total de 23 días hábiles).
Increméntanse os importes do seguro colectivo: accidente laboral ou común ou enfermidade profesional con resultado de morte: 26.000 € (ata o de agora eran 24.000); accidente laboral ou común ou enfermidade profesional con resultado de invalidez permanente total, absoluta ou grande invalidez: 30.000 € (ata o de agora eran 28.000).
Regúlase o contrato formativo, cun limiar salarial do SMI para os contratos para a obtención da práctica profesional, e do SMI 10 % no segundo ano para os de formación en alternancia ou FP dual (en todo caso, en proporción ao tempo de traballo efectivo).
Vixencia do convenio: tres anos, do 01/01/2023 ao 31/12/2025.
As subidas de marxes empresariais
O recentemente publicado Observatorio de Marxes Empresariais mostraba que as marxes obtidas polas empresas se atopan en máximos históricos, tanto en termos absolutos como relativos, e como foron as empresas e sectores con maior poder de mercado os que máis dispararon as súas marxes á conta de trasladar con fartura a subida dos seus custos aos seus clientes e de aumentar a parte do valor engadido xerado que queda en detrimento dos salarios.
O convenio non recupera o poder adquisitivo dos salarios do sector do metal
En 2023, cos datos ata xuño, rexistráronse xa 2707 convenios colectivos con efectos económicos, que cobren a 8,3 millóns de traballadores (o 70 % da poboación cuberta con negociación colectiva) e cunha suba salarial inicial pactada do 3,26 % para 2023, superior ao IPC interanual en xuño, pero aínda por baixo das previsións de suba media da inflación para este ano (4 %) e da inflación media no que levamos de 2023 (4,1 %).
CCOO seguirá traballando e loitando por unhas condicións xustas, dignas e sen discriminacións no sector do metal da provincia de Pontevedra. O primeiro paso serÁ conseguir que todas as persoas afectadas polo convenio asinado perciban os atrasos antes do 31/10/2023.
CCOO pon en valor a unidade sindical e respecta a decisión tomada pola UGT e CIG tras as consultas coa súa afiliación.