Comparecencia de Manuel Quiñoá (na mesa), canda persoal da residencia e entidades da Terra Chá para denunciar a situación na empresa
Desde CCOO congratúlanse por esta decisión, pois en todo momento o sindicato —que representou xudicialmente a afectada— defendeu que o despedimento da traballadora era unha represalia pola súa actitude combativa á hora de denunciar as condicións de traballo na residencia.
A propia sentenza coida acreditada esa actitude reivindicativa da traballadora despedida, corroborada tanto polos testemuños presentados no xuízo como polo relato e documentación dos feitos probados, entre eles distintas denuncias presentadas no Concello de Vilalba, na Consellaría de Política Social ou na Inspección de Traballo meses antes do despedimento.
«Por todo o exposto, enténdese que a demandante acreditou indicios suficientes que avalan que a decisión empresarial [...] trátase, en realidade, dunha represalia fronte a ela polas queixas formuladas», subliña a sentenza.
Pola contra, a carta de despedimento unicamente alude a unha suposta «perda de confianza» pola «oposición permanente» da traballadora ao «sistema organizativo» da residencia. A «lacónica» descrición dos motivos para a rescisión do contrato «equivale, en todo caso, a non dicir nada sobre as causas concretas do despedimento», censura a sentenza.
CCOO agradece o apoio do tecido social da Terra Chá á traballadora e ás denuncias sobre a represión laboral na residencia, especialmente ao Sindicato Labrego Galego —que compareceu como testemuña no xuízo— e ao movemento feminista da comarca.
«Tiñamos claro que era unha represalia»
O secretario xeral da Unión Comarcal de CCOO de Lugo, Manuel Quiñoá, sinala que «cando despediron a esta traballadora tiñamos claro que era unha represalia pola súa actitude combativa á hora de denunciar as condicións de traballo na residencia».
Na súa opinión, a sentenza «marca un punto de inflexión» na Fundación, unha institución «que parecía intocable» en Vilalba «por dar unha aparencia de seriedade e rigor de cara a fóra, pero que de portas para dentro é todo o contrario».
O sindicalista aplaude a actitude das traballadoras, que «plantaron cara» á adversidade «porque non queren ser cómplices das atrocidades que se están a cometer nas residencias; cando loitan polos seus dereitos laborais, tamén loitan polos dereitos das persoas residentes».
Por último, o secretario xeral de CCOO de Lugo denuncia a actitude da Xunta de Galicia, «que mira para outro lado» e permite que este tipo de entidades «fagan negocio cos nosos maiores».