Sindicato Nacional de Comisións Obreiras de Galicia | 29 Agosto 2025.

O comité intercentros da CRTVG pide a «intervención urxente» da Xunta e do Parlamento fronte ao «delirio informativo partidista»

    O comité intercentros da Corporación de Radio e Televisión de Galicia (CRTVG) pide a «intervención urxente» da Xunta de Galicia e do Parlamento galego para que poñan fin a unhas «prácticas incompatibles coa prestación do servizo público». Ademais, amosan a súa oposición a unha manipulación que consideran xa «un gravísimo delirio partidista».

    30/11/2023.
    Redacción da Televisión de Galicia durante a xornada de folga do 24 de marzo de 2023

    Redacción da Televisión de Galicia durante a xornada de folga do 24 de marzo de 2023

    Para iso, o comité acaba de solicitar xuntanzas co presidente da Xunta, Alfonso Rueda, e os líderes da oposición, Ana Pontón (BNG) e Xosé Ramón Gómez Besteiro (PSdeG) para lles transmitir a «gravidade da situación» que atravesan a radio e a televisión públicas, e instalos «a que fagan o que estimen conveniente para renovar unha cúpula que perdeu o norte».

    Segundo o comité, tanto a TVG como a Radio Galega «abandonaron todo respecto polas mínimas normas deontolóxicas» do xornalismo e «reproducen sen pudor» en cada informativo «a liña que marca o Partido Popular».

    Sinalan que a manipulación se agravou de xeito especial na radio pública, onde o 23 de outubro, «xa ben iniciada a temporada de outono», houbo cambios «sorpresivos» de organización e de contidos «que a empresa non quixo xustificar e que o persoal interpreta en chave de incrementar o control político».

    Nun extenso comunicado, o comité relata un por un diversos episodios de manipulación e uso partidista dos medios públicos que se produciron nos últimos meses, tanto na televisión como na radio. «Lamentablemente —denuncian—, os novos medios son outro campo de batalla ideolóxica», pois nas redes sociais da Corporación tamén se repiten «falacias partidistas», ao tempo que «se permiten frivolizar con temas que xeran preocupación social como a violencia machista».

    O comité intercentros, «consciente de que a maquinaria manipuladora se intensificará aínda máis de cara ás inminentes eleccións autonómicas», esixe o cesamento inmediato de todas as persoas «responsables desta anomalía democrática».

      •