Sindicato Nacional de Comisións Obreiras de Galicia | 29 Agosto 2025.

CCOO coida unha «grave irresponsabilidade» non protexer as nenas e nenos estranxeiros desamparados

    O Sindicato Nacional de Comisións Obreiras de Galicia coida unha «grave irresponsabilidade» non protexer as nenas e nenos estranxeiros desamparados. Neste sentido, o sindicato rexeita a postura da Xunta de Galicia, expresada a través da conselleira de Política Social, Fabiola García, quen insiste en que a comunidade autónoma non ten capacidade para acoller máis menores.

    27/08/2025.
    CCOO sinala que é unha obriga legal o coidado e protección dos menores migrantes | Foto: Pixabay

    CCOO sinala que é unha obriga legal o coidado e protección dos menores migrantes | Foto: Pixabay

    «Este discurso non só esquece que a protección da infancia é unha obriga legal e ética, senón que transmite unha mensaxe perigosa: que existen menores de “primeira” e de “segunda” segundo a súa orixe», censura a secretaria de Organización e Políticas Públicas de CCOO, Maica Bouza.

    Ademais de amosar reticencia a participar nunha repartición solidaria cando se dispón dun financiamento específico por parte do Estado, as declaracións da conselleira «evidencian unha falta de vontade política máis ca unha imposibilidade real», insiste a sindicalista.

    Un deber legal

    O ordenamento xurídico español e internacional prevé a protección da infancia e establece o deber dos poderes públicos de garantir e preservar ese coidado. Os nenos e nenas estranxeiros que chegan a España en situación de desamparo —isto é, sen proxenitores nin núcleo familiar que os coide e protexa— «son, antes de nada, menores de idade, polo tanto, son suxeitos da máxima protección», advirte Maica Bouza.

    A responsable de Políticas Públicas de CCOO lémbralle á Xunta que os intereses destes menores «han ser sempre preservados, especialmente por parte dos poderes públicos». Ao respecto, a sindicalista recálcalle ao Goberno galego que a competencia sobre o coidado destes menores é das comunidades autónomas.

    CCOO afea a «demagoxia» do PP

    «Desde hai tempo asistimos a unha demagoxia irresponsable» do PP, que co principal obxectivo de danar o Goberno central, «utiliza os menores migrantes como arma arreboladiza para facer oposición destrutiva». Para CCOO, non se trata só dunha cuestión xurídica, senón tamén dunha «cuestión de solidariedade territorial» dentro de España. «A mesma solidariedade que se lle pide á Unión Europea respecto á repartición de persoas migrantes nos países que somos fronteira exterior», incide Maica Bouza.

    Nun clima político sensato, «a repartición destes menores debería ser unha cuestión de Estado, resolta de maneira normalizada, sen espaventos nin ruído», conclúe a sindicalista, quen chama afastar esta cuestión «tan sensible» da liorta entre os partidos políticos.

      •