Sindicato Nacional de Comisións Obreiras de Galicia | 29 Novembro 2025.

Persoal do Concello de Muros mobilízase pola equidade salarial e a RPT

    As nóminas de polo menos quince traballadores, requiren un suplemento para alcanzar o salario mínimo legal.

    29/11/2025.
    Protesta d@s traballador@s as portas do Concello

    Protesta d@s traballador@s as portas do Concello

    O persoal laboral do Concello de Muros iniciou unha campaña de mobilizacións para esixir o cesamento da prolongada discriminación salarial. As protestas, que se repetiron o pasado xoves, céntranse en que algúns empregados non reciben os complementos específicos e de destino, e en que as nóminas de polo menos quince traballadores requiren un suplemento para alcanzar o salario mínimo legal.

    Para corrixir esta situación de inxustiza, os traballadores esixen que os grupos políticos acorden a aprobación de orzamentos que permitan a elaboración dunha Relación de Postos de Traballo (RPT), un documento actualmente inexistente. O obstáculo principal que impide a aprobación da RPT radica na complexidade da situación, o que provocou que a súa elaboración estea a tomar máis tempo do esperado, co consecuente prexuízo para o persoal.

    A pesar de que a alcaldesa recoñeceu que as demandas dos traballadores son «totalmente xustas e lícitas» e asumiu o compromiso persoal de elaborar a RPT, os prazos seguen sendo moi largos. De feito se entregou un primeiro borrador do organigrama ao comité e estanse estudando as achegas feitas polos traballadores.

    A RPT é fundamental para os traballadores, xa que buscan poñer fin á discriminación salarial e a unha inxustiza coñecida e prolongada no tempo.

    As mobilizacións dos traballadores repetiranse os últimos xoves de cada mes, para coincidir co pleno da corporación.

      •