Sindicato Nacional de Comisións Obreiras de Galicia | 10 Febreiro 2026.

Galicia perde oito de cada dez empregos creados en decembro, coas mulleres como principais prexudicadas

    CCOO chama a Xunta de Galicia a que deseñe políticas que desestacionalicen o emprego no sector dos servizos e aposten por actividades de alto valor engadido

    03/02/2026.
    Datos do paro do mes de xaneiro de 2026 | Imaxe: Google Street View

    Datos do paro do mes de xaneiro de 2026 | Imaxe: Google Street View

    Os datos coñecidos hoxe indican que en xaneiro o paro rexistrado subiu en Galicia en 3313 persoas, un 2,8 %, porcentaxe superior á suba anotada no conxunto do Estado (1,2 %). A afiliación á Seguridade Social, tomando o dato do último día do mes, rexistra unha caída de 1661 afiliados e afiliadas respecto ao mesmo período do mes anterior, un –0,1 % (no Estado baixa un –0,5 %).

    A evolución do mercado laboral galego no mes de xaneiro responde á finalización do período de contratación da campaña de Nadal, como acontece todos os anos nestas datas. Evolución que aínda por ser esperada non é menos preocupante.

    O incremento do desemprego e súa concentración no sector dos servizos e nas mulleres reflicte a excesiva dependencia da economía galega das actividades de baixo valor engadido que están, á súa vez, fortemente feminizadas. Desde CCOO facemos unha chamada á Xunta de Galicia para que deseñe políticas que desestacionalicen o emprego no sector dos servizos e aposten por actividades de alto valor engadido.

    Unha vez máis, e xa van demasiadas, denunciamos a precariedade laboral das mulleres galegas e a necesidade de tomar medidas urxentes dunha vez para dignificar o emprego feminino.

    Por último, e como único dato positivo, cómpre destacar o importante incremento da contratación indefinida, que medra un 17,9 % no mes de xaneiro e supón o 32,2 % da contratación (41,6 % no Estado).

    Análise por sexos e sectores

    En Galicia están no desemprego 48 319 homes (998 máis que en decembro) e 66 825 mulleres (2115 máis ca no mes anterior). Seis de cada dez persoas paradas son mulleres. Atendendo ás idades, hai 5229 persoas menores de 25 anos inscritas no Servizo Público de Emprego (339 máis ca en decembro) e 109 915 maiores desa idade (2774 máis).

    O paro só diminúe na construción, con 72 persoas desempregadas menos, e sobe no resto dos sectores: no primario con 43 persoas desempregadas máis, na industria 56 máis e nos servizos con 2884 máis. No colectivo sen emprego anterior, o desemprego medra en 200 persoas. A evolución do emprego por sectores responde ao patrón dos meses de xaneiro, cando se perde boa parte do emprego creado na campaña de Nadal e de rebaixas do sector dos servizos, tal e como reflicte o dato incremento do desemprego dun 3,6 % nese ramo.

    En xaneiro rexistráronse en Galicia 51 705 contratos, –3060 que en decembro, dos que 35 026 foron temporais e 16 679 indefinidos. A contratación indefinida medra un 17,9 % e supón un 32,2 % da contratación rexistrada. Os contratos temporais redúcense nun –15,9 %.

    Afiliación á Seguridade Social

    Canto á Seguridade Social, cos datos do último día de mes, a afiliación cae en –1661 persoas, ata situarse en 1 084 626 afiliados e afiliadas, rexistrando unha caída do 0,1 % con respecto ao mes anterior.

    A afiliación media mensual cae en 13 462 persoas, situando o número de persoas traballadoras afiliadas en 1 083 826. Deste total, 863 624 corresponden ao réxime xeral, 203 351 ao de autónomos e 16 851 ao réxime especial do mar. A afiliación media en Galicia cae un 1,2 %.

    Tendo en conta a evolución da afiliación nos réximes xeral e autónomos, comprobamos que no mes de xaneiro cae a afiliación de maneira importante no comercio (16 109 menos), na hostalería (1908 empregos menos) e na sanidade (2303), o que corrobora a evolución sectorial e por sexos do desemprego.

    Prestacións por desemprego

    En decembro cobraron algún tipo de prestación por desemprego 65 871 persoas: 4306 prestacións contributivas e 23 565 subsidios.

    En relación aos ERTE do mes de xaneiro, hai que sinalar que o número de traballadores e traballadoras afectados ascende a 324 a final do mes, das cales 271 estaban en ERTE por causas económicas, técnicas, organizativas ou de produción e 53 en ERTE por forza maior.