Sindicato Nacional de Comisións Obreiras de Galicia | 9 Abril 2026.

CCOO denuncia un sistema de favoritismo institucional na Deputación e no Concello de Lugo

    O caso do nomeamento do fillo do alcalde na Deputación de Lugo non é un feito illado: é o síntoma dunha forma de gobernar que prioriza os intereses persoais sobre a igualdade de oportunidades e os dereitos laborais.

    06/04/2026.
    Casa consistorial de Lugo.

    Casa consistorial de Lugo.

    O pasado 16 de marzo de 2026, o fillo do alcalde de Lugo tomou posesión como funcionario na Deputación de Lugo. Ese mesmo día, un decreto de presidencia comisionouno de volta ao Concello de Burela, onde xa exercía previamente. Para que iso fose posible, a Deputación denegoulle a prórroga a outra funcionaria habilitada nacional que solicitara continuar no seu posto. Esa funcionaria xa recorreu a decisión xudicialmente.

    Tres persoas pedían prórroga. Dúas recibiron resposta favorable. Unha non. E xusto ese oco quedou libre para ser cuberto por quen ten un pai alcalde. Iso non é casualidade. Iso é unha decisión.

    Dende CCOO Lugo non cuestionamos a capacidade nin a preparación do funcionario nomeado. A cuestión é outra: nas Administracións lucenses hai persoal cualificado, con anos de esforzo e sacrificio, que non pode desenvolver o seu traballo en condicións dignas porque as estruturas de persoal levan anos bloqueadas. Sete anos sen abrir a RPT no Concello de Lugo. Sete anos bloqueando dereitos, sen executar sentenzas firmes, sen cubrir vacantes, sen dar oportunidades reais a quen estuda e se prepara.

    Nese tempo caducaron ofertas de emprego público que poderían incorporar decenas de profesionais. Prazas que se deixaron perder por pura desidia. E mentres tanto, servizos públicos esenciais seguen con carencias importantes. Hai talento que marcha porque ninguén quere quedar nunha administración que non funciona e que só se move con axilidade cando interesa.

    Fillos de alcaldes hai moitos. Primeiros de oposición tamén. A diferenza é que a maioría non contan cunha estrutura institucional movéndose ao seu redor.

    Suplusa-Tragsa: o precedente dunha forma de gobernar

    Este caso non é novo. O Tribunal Supremo declarou nulos a compra dunha acción de Tragsa por parte da Deputación de Lugo e todos as encargas posteriores á empresa pública, nunha sentenza que crea xurisprudencia no ámbito nacional. O resultado: traballadores procedentes de Suplusa levan meses en situación de absoluta incerteza, sen que a institución aclare o seu futuro nin dea cumprimento á sentenza.

    Uns foron enviados a Tragsa, outros quedaron na Deputación, sen explicación clara nin criterio transparente. A pregunta que moitos se fixeron —por que uns si e outros non— quedou sen resposta. Tamén iso é unha forma de gobernar.

    Dende CCOO Lugo afirmamos con claridade: isto non vai de legalidade, vai de igualdade. E a igualdade desapareceu. Estamos ante un sistema onde algúns sempre chegan e outros nin sequera poden competir en condicións reais. Mover pezas. Abrir ocos. Colocar a quen toca. Poida que todo sexa legal. É profundamente inxusto.

    Esiximos:

    → A apertura inmediata da RPT do Concello de Lugo, con participación efectiva da representación legal dos traballadores e traballadoras.

    → O cumprimento das sentenzas xudiciais pendentes en materia de persoal.

    → A reintegración dos traballadores de Suplusa-Tragsa na Deputación de Lugo.

    → Transparencia e criterios obxectivos en todos os procesos de persoal das Administracións lucenses.

    → Que as Administracións públicas traballen para a cidadanía, non para si mesmas.