Sindicato Nacional de Comisións Obreiras de Galicia | 14 Outubro 2026.

15 de outubro - Día das Mulleres Rurais

    14/10/2026.
    15 de outubro, Día das Mulleres Rurais

    15 de outubro, Día das Mulleres Rurais

    O Ministerio de Agricultura, Pesca e Alimentación recolle na súa páxina web a historia do nacemento da conmemoración deste día internacional:

    En 2008, a Asemblea de Nacións Unidas recoñecía a «función e contribución decisivas da muller rural, incluída a muller indíxena, na promoción e desenvolvemento agrícola e rural, a mellora da seguridade alimentaria e a erradicación da pobreza rural». A ONU entendía que «mundialmente, con poucas excepcións, todos os indicadores de xénero e desenvolvemento mostran que as campesiñas se atopan en peores condicións que os homes do campo e que as mulleres urbanas».

    Así, esa reivindicación internacional por fin visibilizaba o papel fundamental que as mulleres representan nas economías rurais, sobre todo nos países en vías de desenvolvemento. Tamén nos lembra a ONU que «as mulleres rurais custodian o medio ambiente e a diversidade».

    En Galicia, o noso rural segue a ser fonte de discriminacións para moitas mulleres —como acontece no resto de comunidades cunha forte dependencia do medio rural—, mesmo sendo elas as principais sustentadoras desas economías (agricultura e gandería, particularmente). Por iso CCOO demanda para elas condicións laborais e de vida dignas e xustas.

    Denunciamos que sen as mulleres do rural galego, a nosa alimentación, a nosa agricultura e os nosos campos e montes estarían abocados á destrución.

    Por todo isto, o Sindicato Nacional de CCOO de Galicia defende un rural vivo, dinámico e, sobre todo, equitativo. Levamos anos apoiando os movementos que defenden a mellora das condicións de vida no agro desde o noso ámbito laboral.

    Reivindicamos que a fenda salarial desapareza tamén dos contratos do agro, que se lles recoñeza ás mulleres a propiedade conxunta das explotacións gandeiras cando corresponde (dereitos sobre a terra), así como un trato xusto e dereitos laborais en igualdade de condicións para as traballadoras inmigrantes nos nosos campos ou empresas agroalimentarias. Máis aínda, reivindicamos o necesario pulo na implantación masiva das redes de conexión tecnolóxicas no rural, medios e servizos necesarios e suficientes e a erradicación dos prexuízos arredor dos labores agroalimentarios. Todo isto é necesario para un medio rural onde as mulleres compartan as mesmas oportunidades e gocen, en igualdade de condicións, dos mesmos dereitos que os homes.

    CCOO coas mulleres do rural!

    Documentación asociada

    15 de outubro, Día das Mulleres Rurais 2026

    Documentación asociada

    15 de outubro, Día das Mulleres Rurais 2026