Sindicato Nacional de Comisións Obreiras de Galicia | 15 Xuño 2025.

28 de Maio - Día Internacional de Acción pola Saúde das Mulleres

    Un ano máis, desde as CCOO de Galicia reivindicamos a necesidade de visibilizar a problemática que o machismo e os nesgos inconscientes de xénero causan na saúde das mulleres por todo o mundo.

    27/05/2025.
    28 de maio, Día Internacional de Acción pola Saúde das Mulleres

    28 de maio, Día Internacional de Acción pola Saúde das Mulleres

    Continuar empregando o home como «suxeito universal», cando múltiples investigacións e análises xa probaron que este non é tal, segue a causar unha forte fenda entre a saúde física e mental de mulleres e homes.

    Este día reivindica a necesaria aplicación transversal da perspectiva de xénero, tanto na investigación científica como médica, en especial nas ciencias da saúde e da farmacéutica, así como nas dos riscos laborais e de enfermidades profesionais.

    Ademais de ser un imperativo legal, é unha cuestión de dereitos humanos: é unha cuestión de igualdade de trato no fundamental dereito á vida.

    Esta fenda na saúde explica unha moi elevada porcentaxe de diagnoses erradas e o exceso de medicación ao que son sometidas moitas traballadoras, cuxas enfermidades profesionais se confunden ou mesturan con doenzas consideradas erroneamente de mulleres (isto é, derivadas do feito de ser muller e non de factores externos). Este tratamento patriarcal das doenzas por sexos é a orixe, entre outras cousas, dunha interpretación de mínimos no recoñecemento destas como enfermidades profesionais e, malia a insistencia de CCOO, ao non recollelas como tal no regulamento correspondente, fomentan a desigualdade no acceso aos dereitos derivados dese recoñecemento e, en definitiva, contribúen á fenda salarial (especialmente, a das pensións). 

    A loita das CCOO pola aplicación da perspectiva de xénero neste senso está a promover melloras e cambios significativos nalgúns dos sectores máis feminizados, pero aínda estamos moi lonxe dun verdadeiro tratamento equitativo e igualitario das mulleres no terreo da saúde, incluída a saúde laboral, pois, ao se tratar de doenzas derivadas de postos de traballo feminizados —que, prexuizosamente, son considerados de «baixo risco»—, faltan a visibilización e unha formación específica das persoas que analizan eses riscos.

    As CCOO incorporamos hai anos a perspectiva de xénero na nosa loita, desenvolvendo un compromiso a través da negociación colectiva, pero tamén instando as Administracións a que avancen máis rápido nesta materia.

    Entre outras, traballamos a proposta específica de ampliar e revisar con perspectiva de xénero a listaxe de enfermidades profesionais; tamén promovemos de xeito transversal o desenvolvemento de leis e regulamentos de igualdade que insistan na obriga de revisar a saúde psicosocial na avaliación de riscos dos postos de traballo nas empresas; facemos forza para incorporar a obriga das empresas de establecer protocolos de actuación fronte aos acosos sexuais e por razón de sexo que protexan as traballadoras; ou procuramos a negociación, no seo dos plans de igualdade, de protocolos de protección da maternidade.

    Coma sempre que falamos de fendas, CCOO quere recordar que a perspectiva de xénero cuestiona os estereotipos con que se nos educa, abrindo a posibilidade de elaborar novos contidos de socialización e relación entre os seres humanos. A súa aplicación corrixirá parte dos desequilibrios que existen entre mulleres e homes, tamén no relativo aos riscos laborais e á saúde. 

    Así mesmo, temos que instar as empresas a erradicar a división sexual do traballo. Nas negociacións de plans de igualdade e dos convenios colectivos debemos incluír medidas e incentivos que repercutan no desenvolvemento dunha sociedade máis igualitaria, onde homes e mulleres comprendan a necesidade de que a saúde e a prevención de riscos laborais se analicen e discutan desde a perspectiva de xénero. 

    Para que esta defensa da saúde de todas as persoas en igualdade de condicións e tratamento sexa efectiva, reivindicamos que tanto as empresas como as persoas traballadoras coñezan a lexislación que recolle os requisitos mínimos de obrigado cumprimento. 

    En moitas empresas e organizacións, a estruturación do traballo segue respondendo ao modelo dun empregado varón, así que é lóxico que a revisión de riscos no posto sexa cega ao xénero. Por iso avogamos por unha negociación colectiva que se esforce na desmasculinización de todos os dereitos e medidas establecidas na regulación (lexislativa e de convenio) sobre a saúde laboral e a prevención de riscos, para superar definitivamente ese falso suxeito universal baseado no androcentrismo e, polo tanto, ineficaz.

    Desde CCOO defendemos a igualdade na saúde fronte a unha realidade médica aínda reticente: as mulleres levan décadas sufrindo por ese déficit na consideración dun suxeito universal que, en realidade, non o é. Ademais, este modelo «universal» (home, mozo ou de mediana idade, sen responsabilidades familiares) non é só discriminatorio para as mulleres, tamén o é para todas as persoas que non se corresponden con ese suxeito androcéntrico (trans, intersexuais...). Por iso loitamos para que a saúde se conciba nun sentido amplo, entendéndoa como dereitos dirixidos a todas as persoas traballadoras. 

    En definitiva, un ano máis, as CCOO aproveitamos este día para insistir na imprescindible reivindicación por unha saúde laboral equitativa, especialmente nos empregos!

    Documentación asociada

    28 de Maio - Día Internacional de Acción pola Saúde das Mulleres [PDF]

      •
    Documentación asociada

    28 de Maio - Día Internacional de Acción pola Saúde das Mulleres [PDF]