Sindicato Nacional de Comisións Obreiras de Galicia | 28 Marzo 2024.

Pídenlle a Defensa que a transformación do buque 'Galicia' se faga en Ferrol

    O comité de empresa de Navantia e a representación sindical da industria auxiliar solicítanlle ao Ministerio de Defensa que as obras de transformación do buque Galicia se fagan na ría de Ferrol.

    22/04/2021.
    O Ministerio comproulle o buque 'Galicia' á navieira Suardíaz | Foto: Grupo Suardíaz

    O Ministerio comproulle o buque 'Galicia' á navieira Suardíaz | Foto: Grupo Suardíaz

    Afirman que Navantia sempre foi o «estaleiro de referencia» para a reparación dos buques da armada, «cumprindo con todos os estándares de calidade».

    Ante a falta de carga de traballo nos estaleiros públicos, que castiga a comarca de Ferrol e pon en perigo o futuro do sector naval na ría, pídenlle á ministra Robles que a transformación do Galicia se faga na comunidade autónoma, garantindo así carga de traballo ata a construción das fragatas F-110.

    Transformación de buque civil a militar

    O Ministerio adquiriulle o buque Galicia á navieira Suardíaz a finais do 2020 por 7,5 millóns de euros, co obxectivo de cubrir as necesidades para o desprazamento por mar de tropas e blindados. Actualmente, o buque está na dársena de Bouzas (Vigo), onde está a ser adecuado por Suardíaz antes de llo entregar a Defensa, de acordo coas condicións establecidas no contrato de subministración.

    Dado que o departamento técnico de Navantia foi o que deseñou o proxecto para transformar o Galicia nun buque de transporte militar, os sindicatos coidan que o proceso debería completarse nos estaleiros públicos da ría de Ferrol.